ਡਾ. ਅਸ਼ੋਕ ਉਪਲ ਦੀ ਅਗਵਾਈ `ਚ ਆਈ.ਐਮ.ਏ ਨੇ ਮਨਾਇਆ 69ਵਾਂ ਗਣਤੰਤਰ ਦਿਵਸ

ਅੰਮ੍ਰਿਤਸਰ, 26 ਜਨਵਰੀ (ਪੰਜਾਬ ਪੋਸਟ – ਸੁਖਬੀਰ ਸਿੰਘ ਖੁਰਮਣੀਆ) –  ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ ਅੰਮ੍ਰਿਤਸਰ ਦੇ ਪ੍ਰਧਾਨ ਡਾ. ਅਸ਼ੋਕ ਉਪਲ ਦੀ ਅਗਵਾਈ `ਚ ਆਈ.ਐਮ.ਏ ਦੇ ਮੈਂਬਰਾਂ ਵਲੋਂ 69ਵਾਂ ਗਣਤੰਤਰ ਦਿਵਸ ਬੜੇ ਜੋਸ਼ੋ ਖਰੋਸ਼ ਨਾਲ ਮਨਾਇਆ ਗਿਆ।ਡਾ. ਅਸ਼ੋਕ ਉਪਲ ਵਲੋਂ ਸਥਾਨਕ ਬਸੰਤ ਐਵਨਿਉ ਵਿਖੇ ਸਥਿਤ ਆਈ.ਐਮ.ਏ ਹਾਊਸ ਵਿਚ ਝੰਡਾ ਲਹਿਰਾਉਣ ਤੋਂ ਬਾਅਦ  ਗਣਤੰਤਰ ਦਿਵਸ ਦੀ ਦੇਸ਼ ਵਾਸੀਆਂ ਨੂੰ ਮੁਬਾਰਕਬਾਦ ਦਿੰਦਿਆਂ ਕਿਹਾ ਕਿ ਸਾਰੇ ਡਾਕਟਰਾਂ ਦੀਆਂ ਦੇਸ਼ ਅਤੇ ਸਮਾਜ ਦੇ ਪ੍ਰਤੀ ਅਹਿਮ ਜਿੰਮੇਵਾਰੀਆਂ ਹਨ, ਉਹਨਾਂ ਨੂੰ ਆਪਣੀਆਂ ਸੇਵਾਵਾਂ ਬੜੀ ਇਮਾਨਦਾਰੀ ਅਤੇ ਤਨਦੇਹੀ ਨਾਲ ਨਿਭਾਉਣੀਆਂ ਚਾਹੀਦੀਆਂ ਹਨ।ਉਹਨਾਂ ਕਿਹਾ ਕਿ ਡਾਕਟਰੀ ਪੇਸ਼ੇ ਦਾ ਨਰੋਇਆ, ਸਿਹਤਮੰਦ ਦੇਸ਼ ਤੇ ਸਮਾਜ ਸਿਰਜਾਣ ਵਿੱਚ ਵਿਸ਼ੇਸ਼ ਯੋਗਦਾਨ ਹੁੰਦਾ ਹੈ। ਡਾ. ਉਪਲ ਨੇ ਆਪਣੇ ਭਾਸ਼ਣ ਵਿਚ ਹੋਰ ਕਿਹਾ ਕਿ ਆਈ.ਐਮ.ਏ ਹਾਊਸ ਵਿਚ ਮੁਫਤ ਓ.ਪੀ.ਡੀ ਦੀ ਸ਼ੁਰੂਆਤ ਹੋ ਚੁੱਕੀ ਹੈ ਅਤੇ ਮਰੀਜ਼ਾਂ ਨੂੰ ਮੁਢਲੀਆਂ ਦਵਾਈਆਂ ਵੀ ਮੁਫ਼ਤ ਦਿੱਤੀਆਂ ਜਾ ਰਹੀਆਂ ਹਨ।ਡਾ. ਉਪਲ ਨੇ ਕਿਹਾ ਕਿ ਆਉਣ ਵਾਲੇ ਦਿਨਾਂ ਵਿੱਚ ਮੁੱਢਲੇ ਟੈਸਟ ਅਤੇ ਸੁਪਰਸਪੈਸ਼ਲਿਸਟਾਂ ਦੀ ਓ.ਪੀ.ਡੀ  ਵੀ ਸ਼ੁਰੂ ਕੀਤੀ ਜਾਵੇਗੀ।