ਕੁਰਬਾਨੀ

ਰਾਜਗੁਰੂ, ਸੁਖਦੇਵ, ਭਗਤ ਸਿੰਘ,
ਦੇ ਗਏ ਸੇਧ ਜਵਾਨੀ ਨੂੰ।
ਤੇਈ ਮਾਰਚ ਨੂੰ ਸੀਸ ਨਿਵਾਈਏ,
ਤਿੰਨਾਂ ਦੀ ਕੁਰਬਾਨੀ ਨੂੰ …

ਸਮਝ ਆਈ ਜਦ ਦੇਸ਼ ਨੂੰ ਲੁੱਟ ਕੇ,
ਘਰ ਹੀ ਹਾਕਮ ਭਰਦਾ ਏ।
ਉਸੇ ਦਿਨ ਤੋਂ ਰਾਜਗੁਰੂ ਵੀ,
ਇਨਕਲਾਬ ਹੀ ਕਰਦਾ ਏ।
ਕਦੇ ਵੀ ਮੱਠਾ ਪੈਣ ਨਹੀਂ ਦਿੱਤਾ,
ਜ਼ਜ਼੍ਹਬੇ ਉਸ ਤੁਫਾਨੀ ਨੂੰ ।
ਤੇਈ ਮਾਰਚ ਨੂੰ ਸੀਸ ਨਿਵਾਈਏ,
ਤਿੰਨਾਂ ਦੀ ਕੁਰਬਾਨੀ ਨੂੰ …

ਅਣ-ਮਨੁੱਖੀ ਵੇਖ ਤਸ਼ੱਦਦ,
ਮੂਹਰੇ ਹੋ ਕੇ ਲੜ੍ਹਿਆ ਸੀ।
ਕਰਕੇ ਭੁੱਖ ਹੜ੍ਹਤਾਲ ਮਿਸਾਲੀ,
ਸੁਖਦੇਵ ਅੰਤ ਤੱਕ ਖੜ੍ਹਿਆ ਸੀ।
ਚੱਲਣ ਨਹੀਂਓ ਦਿੱਤਾ ਉਸਨੇ,
ਤਾਨਾਸ਼ਾਹ ਮਨਮਾਨੀ ਨੂੰ।
ਤੇਈ ਮਾਰਚ ਨੂੰ ਸੀਸ ਨਿਵਾਈਏ,
ਤਿੰਨਾਂ ਦੀ ਕੁਰਬਾਨੀ ਨੂੰ …

ਭਗਤ ਸਿੰਘ ਨੇ ਖੁਦ ਸੀ ਦਿੱਤੇ,
ਘਰ-ਘਰ ਜਾ ਕੇ ਹੋ ਕੇ ਜੀ,
ਸਿੱਖਿਆ, ਸਿਹਤ ਤੇ ਰੋਜ਼ਗਾਰ ਦੇ,
ਮਿਲਣ ਬਰਾਬਰ ਮੋਕੇ ਜੀ,
ਸਾਰੀ ਦੁਨੀਆਂ ਸਿਜ਼ਦਾ ਕਰਦੀ,
ਉਹਨਾਂ ਦੀ ਵਿਦਵਾਨੀ ਨੂੰ।
ਤੇਈ ਮਾਰਚ ਨੂੰ ਸੀਸ ਨਿਵਾਈਏ,
ਤਿੰਨਾਂ ਦੀ ਕੁਰਬਾਨੀ ਨੂੰ …

ਦੇਸ਼ ਦੇ ਲੇਖੇ ਲਾ ਕੇ ਜ਼ਿੰਦੜੀ,
ਆਪਣਾ ਫਰਜ਼ ਨਿਭਾਇਆ ਸੀ ।
ਫਾਂਸੀ ਵਾਲਾ ਰੱਸਾ ਚੁੰਮ ਕੇ,
ਹੱਸ ਕੇ ਗਲ਼ ਵਿੱਚ ਪਾਇਆ ਸੀ ।
ਮਾਣ ਤਿੰਨਾਂ ਦੇ ਉਤੇ ਅੱਜ ਏ,
ਹਰ ਇੱਕ ਹਿੰਦੋਸਤਾਨੀ ਨੂੰ ।
ਤੇਈ ਮਾਰਚ ਨੂੰ ਸੀਸ ਨਿਵਾਈਏ,
ਤਿੰਨਾਂ ਦੀ ਕੁਰਬਾਨੀ ਨੂੰ …

ਗੁਰਪ੍ਰੀਤ ਸਿੰਘ ਰੰਗੀਲਪੁਰ
ਗੁਰਦਾਸਪੁਰ।