ਚਿੱਟਾ

ਐਸੀ ਕੀ ਪੰਜਾਬ ਵਿੱਚ ਹਵਾ ਆਈ,
ਹਰ ਪਾਸਿਓਂ ਦੁੱਖਾਂ ਨੇ ਘੇਰਾ ਪਾ ਲਿਆ।
ਸਾਡੀਆਂ ਫ਼ਸਲਾਂ ਨੂੰ ਚਿੱਟੇ ਮੱਛਰ,
‘ਤੇ ਜਵਾਨੀ ਨੂੰ ਚਿੱਟੇ ਨਸ਼ੇ ਨੇ ਖਾ ਲਿਆ।

ਸਵੇਰਾ ਲੱਗਦਾ ਨਾ ਕਿਤੇ ਹੋਣ ਵਾਲਾ,
ਜਿਵੇਂ ਸੂਰਜ ਕਿਸੇ ਨੇ ਭੜੋਲੇ ਪਾ ਲਿਆ।
ਤਰੱਕੀ ਦੀ ਲੱਗਦੀ ਨਾ ਹੁਣ ਉਮੀਦ ਕੋਈ,
ਬਰਬਾਦੀ ਵਾਲਾ ਬੂਟਾ ਘਰੇ ਲਾ ਲਿਆ।

ਮਾਵਾਂ ਦੇ ਪੁੱਤ ‘ਤੇ ਭੈਣਾਂ ਦੇ ਵੀਰ ਤੁਰਗੇ,
ਕਿਸੇ ਕਰਮਾਂ ਮਾਰੀ ਨੇ ਸੁਹਾਗ ਗਵਾ ਲਿਆ।
ਚਿੱਟਾ ਆਖ਼ਦੇ ਸ਼ਾਂਤੀ ਦਾ ਪ੍ਰਤੀਕ ਹੁੰਦਾ,
ਪਰ ਚਿੱਟੇ ਨੇ ਬਰਬਾਦੀ ਦਾ ਜਾਲ ਵਿਛਾ ਲਿਆ।

‘ਸੁੱਖਿਆ ਭੂੰਦੜਾ’ ਕਹਿਣਾ ਮੰਨ ਵੱਡਿਆਂ ਦਾ,
ਫ਼ੇਰ ਕਹੀਂ ਨਾ ਕਿੱਥੋਂ ਸਿਆਪਾ ਗਲ ਪਾ ਲਿਆ।

 

 

 

 

 

 

ਸੁੱਖਾ ਭੂੰਦੜ
ਸ੍ਰੀ ਮੁਕਤਸਰ ਸਾਹਿਬ
ਮੋ: 88729-69075