ਡਰੱਗ ਇੰਸਪੈਕਟਰਾਂ ਦੀ ਟੀਮ ਨੇ ਚੈਕਿੰਗ ਦੌਰਾਨ ਕਰੀਬ 41 ਹਜ਼ਾਰ ਦੇ ਸੈਨੇਟਾਇਜ਼ਰ ਕੀਤੇ ਸੀਲ

ਲੌਂਗੋਵਾਲ, 15 ਮਈ (ਪੰਜਾਬ ਪੋਸਟ – ਜਗਸੀਰ ਲੌਂਗੋਵਾਲ) – ਕੋਵਿਡ-19 ਦੇ ਮੱਦੇਨਜ਼ਰ ਸਿਹਤ ਵਿਭਾਗ ਦੇ ਉੱਚ ਅਧਿਕਾਰੀਆਂ ਦੀਆਂ ਹਦਾਇਤਾਂ ਅਨੁਸਾਰ ਡਰੱਗ ਇੰਸਪੈਕਟਰਾਂ ਦੀ ਸਾਂਝੀ ਟੀਮ ਵਲੋਂ ਸੰਗਰੂਰ ਸ਼ਹਿਰ ਦੇ ਵੱਖ-ਵੱਖ ਇਲਾਕਿਆਂ, ਸਿਵਲ ਹਸਪਤਾਲ ਦੇ ਸਾਹਮਣੇ, ਵੱਡੇ ਚੌਂਕ ਅਤੇ ਪਟਿਆਲਾ ਗੇਟ ਦੇ ਵੱਖ-ਵੱਖ ਮੈਡੀਕਲ ਸਟੋਰਾਂ ਦੀ ਚੈਕਿੰਗ ਕੀਤੀ ਗਈ।ਇਸ ਟੀਮ ਦੀ ਅਗਵਾਈ ਨਵਜੋਤ ਕੌਰ, ਜ਼ੋਨਲ ਲਾਇਸੈਂਸਿੰਗ ਅਥਾਰਟੀ ਸੰਗਰੂਰ ਜ਼ੋਨ ਵਲੋਂ ਕੀਤੀ ਗਈ।
                ਇਸ ਸਬੰਧੀ ਜਣਕਾਰੀ ਦਿੰਦਿਆਂ ਨਵਜੋਤ ਕੌਰ ਨੇ ਦੱਸਿਆ ਕਿ ਟੀਮ ਵਲੋਂ 9 ਮੈਡੀਕਲ ਸਟੋਰਜ਼ ਦੀ ਚੈਕਿੰਗ ਕਰਕੇ 13 ਵੱਖ-ਵੱਖ ਸੈਨੇਟਾਇਜ਼ਰਜ਼ ਦੇ ਸੈਂਪਲ ਲਏ ਗਏ ਹਨ। ਚੈਕਿੰਗ ਦੌਰਾਨ ਨਿਯਮਾਂ ਦੀ ਉਲੰਘਣਾ ਕਾਰਨ ਕਰੀਬ 41 ਹਜ਼ਾਰ ਰੁਪਏ ਦੀ ਕੀਮਤ ਦੇ ਸੈਨੇਟਾਇਜ਼ਰ ਸੀਲ ਕੀਤੇ ਗਏ।ਇਸ ਟੀਮ ਵਿੱਚ ਅਮਨਦੀਪ ਸ਼ਰਮਾ ਡਰੱਗ ਇੰਸਪੈਕਟਰ ਪਟਿਆਲਾ, ਸ੍ਰੀਮਤੀ ਸੁਧਾ ਦਹਿਲ ਡਰੱਗ ਇੰਸਪੈਕਟਰ ਸੰਗਰੂਰ, ਸ੍ਰੀਮਤੀ ਕਰੁਣਾ ਗੁਪਤਾ ਡਰੱਗ ਇੰਸਪੈਕਟਰ ਸੁਨਾਮ, ਸ੍ਰੀਮਤੀ ਪ੍ਰਨੀਤ ਕੌਰ ਡਰੱਗ ਇੰਸਪੈਕਟਰ ਮਾਲੇਰਕੋਟਲਾ ਅਤੇ ਸ਼ੀਸ਼ਨ ਕੁਮਾਰ ਡਰੱਗ ਇੰਸਪੈਕਟਰ ਮਾਨਸਾ ਸ਼ਾਮਲ ਸਨ।