ਸਾਵਣ ਦਾ ਤਿਓਹਾਰ `ਤੀਆਂ` ਉਤਸ਼ਾਹ ਨਾਲ ਮਨਾਇਆ ਗਿਆ

ਅੰਮ੍ਰਿਤਸਰ, 22 ਜੁਲਾਈ (ਪੰਜਾਬ ਪੋਸਟ- ਜਸਬੀਰ ਸਿੰਘ ਸੱਗੂ)  – ਮਦਨ ਮੋਹਨ ਮਾਲਵੀਆ ਰੋਡ ਸਥਿਤ ਇੰਡੀਅਨ ਅਕੈਡਮੀ ਆਫ ਫਾਈਨ ਆਰਟ ਵਿਖੇ ਹਰ ਸਾਲ ਦੀ ਤਰਾਂ ਇਸ ਵਾਰ ਵੀ ਸਾਵਣ ਦਾ ਤਿਓਹਾਰ `ਤੀਆਂ` ਉਤਸ਼ਾਹ ਨਾਲ ਮਨਾਇਆ ਗਿਆ।ਪ੍ਰੋਗਰਾਮ ਦੇ ਕਨਵੀਨਰ ਪ੍ਰਿੰਸੀਪਲ (ਮੈਡਮ) ਤਜਿੰਦਰ ਛੀਨਾ ਦੀ ਦੇਖ ਰੇਖ `ਚ ਹੋਏ ਸਮਾਗਮ ਦੌਰਾਨ ਬਾਲੀਵੁੱਡ ਫਿਲਮਾਂ ਦੇ ਗੀਤ ਅਤੇ ਡਾਂਸ ਕਾਲਜ ਅਤੇ ਸਕੂਲ ਦੀਆਂ ਵਿਦਿਆਰਥਣਾਂ ਤੇ ਸਥਾਨਕ ਕਲਾਕਾਰਾਂ ਵਲੋਂ ਪੇਸ਼ ਕੀਤੇ ਗਏ।
ਖੁਬਸੂਰਤ ਢੰਗ ਨਾਲ ਸਜਾਈ ਧਰਮ ਸਿੰਘ ਆਡੀਟੋਰੀਅਮ ਦੀ ਸਟੇਜ `ਤੇ ਤੀਆਂ ਦੇ ਤਿਓਹਾਰ ਦਾ ਨਜ਼ਾਰਾ ਪੇਸ਼ ਕਰ ਰਹੀ ਸੀ।ਇਸ ਪ੍ਰੋਗਰਾਮ ਵਿਚ ਗੁਰਪ੍ਰੀਤ ਸਿੰਘ ਵਲੋਂ ਹਿੰਦੀ ਗੀਤ `ਮਹੋਬਤ ਬਰਸਾ ਦੇਣਾ ਤੂੰ ਸਾਵਣ ਆਇਆ ਹੈ, ਸ਼ਰੂਤੀ ਵਲੋਂ ਮੌਸਮ ਹੈ ਆਸ਼ਿਕਾਨਾ, ਸਲੋਨੀ ਅਰੋੜਾ ਵਲੋਂ ਸਾਵਣ ਮੇ ਮੋਰਨੀ ਬਣ ਕੇ ਮੈਂ ਤੋਂ ਛਮ-ਛਮ ਨਾਚੂੰਗੀ ਤੋਂ ਇਲਾਵਾ ਪ੍ਰੋਫੈਸਰ ਆਂਚਲ ਅਰੋੜਾ ਆਦਿ ਨੇ ਵੀ ਗੀਤ ਪੇਸ਼ ਕਰ ਕੇ ਸਾਰਿਆਂ ਨੂੰ ਮੰਤਰ ਮੁਗਧ ਕੀਤਾ।ਇੰਦਰਪ੍ਰੀਤ ਕੌਰ ਤੇ ਜਸਮੀਤ ਗਿੱਲ ਵਲੋਂ ਪੰਜਾਬੀ ਗਾਣਾ `ਰੌਣਕ ਹੋ ਜੁ ਘੱਟ ਵੇ ਚੱਲ ਮੇਲੇ ਨੂੰ ਚੱਲੀਏ` `ਤੇ ਭੰਗੜਾ ਪੇਸ਼ ਕੀਤਾ ਗਿਆ।ਮੁਟਿਆਰਾਂ ਦਾ ਭੰਗੜਾ ਦੇਖ ਕੇ ਸਭ ਹੈਰਾਨ ਹੋ ਗਏ।ਮੈਡਮ ਰੇਖਾ ਮਹਾਜਨ, ਮੈਡਮ ਸੁਖਪ੍ਰੀਤ ਕੌਰ ਵਲੋਂ ਕਾਲਜ, ਸਕੂਲ ਦੀਆਂ ਵਿਦਿਆਰਥਣਾਂ ਅਤੇ ਸਮਰ ਕੈਂਪ ਦੇ ਪ੍ਰਤੀਯੋਗੀਆਂ ਨਾਲ ਪੇਸ਼ ਕੀਤੇ ਹਿੰਦੀ ਗਾਣੇ `ਆਇਆ ਸਾਵਣ ਜੂਮ ਕੇ` `ਤੇ ਡਾਂਸ ਦੀ ਦਰਸ਼ਕਾਂ ਨੇ ਤਾਰੀਫ ਕੀਤੀ।
ਇਸ ਪ੍ਰੋਗਰਾਮ ਵਿਚ ਭਾਜਪਾ ਆਗੂ ਤਰੁਣ ਚੁੱਘ, ਖਾਲਸਾ ਕਾਲਜ ਫਾਰ ਵੂਮਨ ਪਿ੍ਰੰਸੀਪਲ ਡਾਕਟਰ ਸੁਖਬੀਰ ਕੌਰ ਮਾਹਲ, ਆਰਟ ਗੈਲਰੀ ਦੇ ਪ੍ਰਧਾਨ ਰਾਜਿੰਦਰ ਮੋਹਨ ਸਿੰਘ ਛੀਨਾ, ਜਰਨਲ ਸੈਕਟਰੀ ਡਾ. ਪਰਮਿੰਦਰ ਸਿੰਘ ਗਰੋਵਰ, ਆਰਕੀਟੈਕਟ ਮਹਿੰਦਰਜੀਤ ਸਿੰਘ, ਹਰਮਿੰਦਰ ਸਿੰਘ ਫਰੀਡਮ, ਸੰਤੋਖ ਸਿੰਘ ਸੇਠੀ, ਅਤੁਲ ਮੇਹਰ, ਕਰਮਜੀਤ ਸਿੰਘ, ਨਰਿੰਦਰਜੀਤ ਸਿੰਘ ਆਰਕੀਟੈਕਟ, ਕੁਲਵੰਤ ਸਿੰਘ ਗਿਲ ਆਦਿ ਸ਼ਖਸ਼ੀਅਤਾਂ ਹਾਜਰ ਸਨ।